Атаман
Группа: Походный Атаман
Сообщений: 6520
Награды: 62
Статус: Offline
|
иже во святых отца нашего святителя Димитрiя митрополита Ростовскаго
АРХIЕРЕWМЪ РОСТОВСКИМЪ ЛЕТОПИСЬ
http://zvon.yaroslavl.ru/letopis.htm
Просветися святым крещением великий князь Владимир в Херсоне, в лето бытия мiра 6496-е, а от воплощения Христова 988-е.
Киев и вся Российская земля крестися в лето от мiробытия 6497-е, а от Христа 989-е.
1. Феодор первый бысть епископ Ростову, от грек пришедый, и крестив многия люди, созда церковь прекрасну во имя Святыя Богородицы от древес дубовых. Не возмог же ростовцев в совершенное привести Богопознание и благоверие христианское, досады же и гонения от них не стерпев, бежа во греки паки (Синопсис же пишет - первый епископ граду Ростову бе Фома, пришедший с князем великим Владимиром во град Владимирь в лето 6504.
2. Иларион грек, из Цареграда пришед и на престоле пожив, людскаго же гнева и досажденiя терпети не возмог, во свою греческую землю отиде.
3. Леонтий святый, такожде от грек, из Цареграда пришел, Цареграда родом; прислан от Фотия патрiарха в лето 6499, ноября 29, изгнан бысть ростовцами от престола, обаче, не оставляя своей паствы, малу церковь устрои близ себе и кутiею дети кормя, учаше я святыя веры, чесо ради и на убiенiе его ростовцы устремились бяху, но силою Божiею возбранены, познаша истинный спасенiя путь и крестишася от св. Леонтiя; утвердивь же Леонтий святые учением и чудотворением в Ростове веру Христову, преставися ко Господу, и погребоша честно тело его в соборной церкви, еже по многих летех обретено бысть нетленно. О сем святителе Леонтiи обретается свидететельство в патерице печерском, на листе 254-м, в посланiи преподобнаго Симеона, епископа владимирскаго, к блаженному Поликарпу печерскому, писанное сице: "Леонтий, епископ ростовский, великiй в святителех, от неверных много пострадав, мученическую кончину сподобися прияти и нетленiем от Бога прославлен есть". Память его маiя 23 день почитается.
4. Исаiя епископ, память его мая 15-го, кiевлянин родом, постриженик святыя обители печерскiя, во дни преподобнаго Феодосия, бысть же первее игумен монастыря святаго великомученика Димитрiя, иже в Киеве на Клове; таже, по преставленiи святаго Леонтiя, епископа ростовскаго, бысть избран епископом Ростову и освящен от Iоанна, митрополита Кiевскаго, в лето от Адама 6585, а от Христа 1077. Пришед же на престол, утверждаше новопросвещенныя люди и обходя грады и веси, яже в Ростовстей и Суждальстей области, сокрушаше идолы, и крещаше прiемлющия святую веру. Егда же приспе освященiе церкви Печерския, восхищен бысть ангелом из Ростова в Киев и, по освящении, возвратися в Ростов. Преставися же ко Господу в лето (яко же в пролозе и в святцах пишется) 6597-е (1089). А достовернее сице, яко же патерик печерский пишет: церковь бо Печерская освящена бысть в лето 6597 (1089), августа в 14 день, кончащуся тому году, в септемрии же, по древнему обычаю, начат числиться год 6598-й, и в той год мая в 15-й день святый Исаия преставися, от Христа в лето 1090.
От лета 6598, по святом Исаии, неведомо кто был епископ долгое время.
5. Ефрем I. В синодце церковном и в летописце пред Нестором положен.
6. Нестор, епископ Ростову и Суждалю, бысть о лете 6664-м, от рождества Христова 1156.
7. Леон. О нем же повествуется, яко живу бывшу Нестору поставися в епископа Ростову, и при сем град Ростов погоре мало не весь, и соборная церковь предивная Успенiя Пресвятыя Богородицы сгоре, яже бе от древа дубоваго прекрасно создана первым епископом ростовским Феодором, прежде святаго Леонтiя и прежде Илариона бывшим. Бе же пожар той в лето 6668-е, а от рождества в 1160-е. А понеже Леон оный бе зол, лаком зело и сребролюбив, и обнажил бяше церкви, и грабяше попы, того ради изгнан бысть от престола в лето 6670, от рождества 1162. По времени же некоем паки прiят в Суждаль (но не в Ростов). Той Леон не велел мяса ясти на рождество Христово и на Богоявление Господне, аще прилучится в среду и в пяток, и ходил в Царьград, и препрен бысть тамо Адрианом, епископом Болгарским, при царе греческом Мануиле.
8. Нестор паки, неведомо той ли или другий того имене. При сем уставлено праздновати Всемилостивому Спасу августа в 1-й день, в лето 6672-е, от рождества 1164-е. Въ то же лето 1164-е заложена бысть первая каменная церковь в Ростове, во дни князя Андрея Боголюбскаго, и обретены быша мощи святаго Леонтия и святаго Исаiи. В та времена епископ Ростовский был и Суждальским и Владимирским и Муромским. Едина была епархия.
9. Феодор II лже-епископ - псевдоепископ (его же послежде Феодорцем прозваша), при Несторе епископе настал бе. Насильник и хищник той похитил престол ростовскiя епископии сицевым образом:
Пойде первее в Царь-град со многим златом и сребром от рода бо велика бе и имеяше богатства много и глагола патриарху ложно, яко несть ныне в Киеве митрополита, и се аз, да поставиши мя в митрополита Киеву. Патрiарх же не прият словес его. И начат он прилежнее молити, глаголя, яко в Ростове епископа несть, ныне убо постави мене епископа Ростову, понеже несть ми в России от никого посвятитися, митрополиту в Киеве не обретавшуся. И поставлен бысть от патриарха в епископа Ростову, в лето 6678-е, от рождества 1170-е. И прииде в Русь на престол ростовскiя епископии, в лето 6679, а от рождества 1171. Бяше же он постриженик Киево-Печерскаго монастыря, нравом зело лют, дерзновенен и безстуден, и телом крепок, а язык имеяше чист; и бе велеречив, в мудровании злокознен, и всем бяше грозен и страшен. И глаголаху нецыи о нем, яко от демона есть сей; инии же волхва быти того нарицаху. Прiемшу же ему престол ростовскiя митрополии, великий князь Андрей Юрьевич, Боголюбский не хотяше слушати его, но глаголаше ему да идет в Кiев к митрополиту Константину, благословенiя ради; он же о том ни мало брежаше. Иногда убо и любовию понуждаше его князь идти в Киев к митрополиту, а он, якоже поставления от митрополита не восхоте, сице и благословения не требоваше, но глаголаше: не митрополит мене постави Ростову, но патриарх в Цареграде, от кого убо другаго благословения ми искати. И тако без печали седяше на престоле, не слушая добраго совета княжева, еще же и укоряше князя многими досадами и хулениями, глаголя нань нелепая, таже во граде Владимiре затвори церкви вся, и не бе пенiя во всем граде том, ни в соборней церкви пречистыя Богородицы Златоверхой, в ней же чудная икона Богородична стояше; таже и во иных градех и волостех сотвори: затвори церкви повсюду, и не бысть пения нигде же. Восхищаше же насильем имения многих, отъемля богатства, и сокровища, противляющихся же ему овыя в заточенiе посылаше, овыя же узами облагаше и в темницах затворяше и мучаше без милости, раны многия налагая и наги свещами пожигая, и иныя лютейшiя мучительства соделовая, и многия умучи до смерти, не точiю мужи, но и жены честныя. И бе грозен и страшен всем, и бояхуся его и трепетаху вси. Рыкаше бо аки лев и яко беснуемый от неприязни. Опечалишася вси людие и приидоша к великому князю во град Владимiр, плачущеся о великих бедах и напастех своих, от епископа им творимых. Князь же посла къ нему, глаголя: се вси людие скорбят и плачутся на тя; добро ти есть престати от гнева и преложитися на кротость и милость; се бо и церкви вся затворил еси, и несть в них пения, и чудотворный пресвятыя Богородицы образ заключил еси. Епископ же Феодор не точiю пременися на кротость и князю укоризненными словесы поругася, но и на Пречистую Богородицу хулу изглагола. Тогда великй князь повеле яти его и посла его, окована железы, в Киев к преосвященному митрополиту Константину. И егда от митрополита испытуем бе о содеянных своих злых делах, он гордостiю взимаяся и неподобная глаголаше: закон Божбий укори и на самого Господа Бога и на Пречистую Богородицу хулу изглагола. Митрополит же увещеваше его от Божественнаго Писания к покаянию, сказуя яко богохульницы судом Божиим и законом градским предаваемы бывают смерти; а он, о том ни мало внимая, более яряшеся и худая блядословяше. Послан убо бысть в заточение на Песий остров, и пребысть тамо все лето без покаянiя, паче же и на горшая хуления небоязненно простираяся. Митрополит убо видя его, аки Фараона, ожесточенна и непокаянна, посла к нему, глаголя сице: на Господа Бога и на Пречистую Божию Матерь и на вси святыя изглаголал еси хулы, и закон Божий укорил еси и множество человек умучил еси, множайшия же соблазнил еси. А Божий закон глаголет сице: в ню же меру мерите, возмерится и вам. Да возмерится убо и тебе по делом твоимь! И повеле на выю его камень жсрио- вый нав.язати, и воврещи въ глубины во~ныл, по словеси Господню: аще кто соблазнит единаго от сих верующих въ Мя, уне ему есть, да обяжется камень жерновый на выю его, и погрязнет в пучине морстей. И тако злый зле погибе. Сей в синодице церковнем не обретается между архиереами, злаго ради жития и кончины его, понеже не дверьми вниде, но прелазе инуде, яко тать, владычествуя яко разбойник и волк хищный, погибе же, яко богопротивник, в лето 6680, а от рождества 1172.
По Феодоре оном, зле скончавшемся, кто епископ бе Ростову до лет 6693, а от рождества 1185, не обретается. Мнится праздну быти престолу, понеже смущения настали бяху, по убиении великаго князя Андрея Юрьевича Боголюбскаго. Есть же писано в летописаниих, яко митрополит Киевскiй Никифорь поставил бе Николая гречанина, но великий князь Всеволод отнюд того не восхоте: самому Богу не благоволившу, несть бо праведно восхищати кому чин святительский на мзде и без соборнаго избрания. И посла князь в Киев к митрополиту инаго прося епископа, и благоволением Божиим избран бысть Лука, игумен Спаский, иже на Берестовом в Киеве.
10. Лука. Взят бысть на епископство из Киева из монастыря Спаскаго, иже на Берестове, посвящен от митрополита Киевскаго Никифора в лето 6693, а от рождества 1185. Муж зело кроток и смирен, любезен, благ и милостив и богоугодное житие имеяй. Преставися же во Владимире, тамо и погребен бысть в соборней церкви в лето 6697-е, ноемврия в 10 день, а от рождества 1189.
11. Иоанн I. Поставлен от тогожде митрополита Никифора в лето 6698, а от рождества 1190. Сей устави праздновати память святаго Леонтия месяца маиа в 23 день. При сем епископе Иоанне падеся соборная церковь Пречистыя Богородицы в Ростове, в лето 6712, а от рождества Христова 1204. При том же паки пожар бысть велий в Ростове, в лето 6720, оть рождества 1212: сгоре церквей 15, и на епископле дворе церковь святаго Иоанна Предтечи вся до основания сгоре со всем, точию остася посреде огня икона святаго великомученика Феодора Тирона и вощаница с вином церковным, юже мняху быти прежде бывшаго епископа Леонтiя. Сей Иоанн остави престол, взем на ся святую схиму и отъиде в монастырь Космы и Дамиана в Суждале, его же сам создал бяше в лето 6721, от рождества 1213.
В то же лето великий князь Константин Всеволодович заложил церковь Пресвятыя Богородицы соборную каменную, на месте падшия.
12. Симон, из Владимiра, из Рождественскаго монастыря поставлен бысть епископом Ростову. Но князь ростовский Константин о Симоне не благоволил, и моли: да духовник его Пахомий на епископство ростовское возведется, и бысть по прошению его.
13. Пахомий, постриженик Печерскаго - Киевскаго монастыря, духовник князя ростовскаго Константина Всеволодовича, посвящен бысть епископ Ростову митрополитом Киевским Матфiем в лето 6722, от рождества 1214, ноемврiя в 10 день. От того времене разделися епископия ростовская надвое: Симон бысть Владимирский, а Пахомiй Ростовский. При епископе Пахомии князь ростовский Константин Всеволодович заложил в Ростове на своем дворе церковь каменную святых страстотерицев Бориса и Глеба, в лето 6723, от рождества 1215.
По Пахомии в синодце церковном полагаются епископы: Киприан и Митрофан, пред Кириллом. И мнится, яко тiи иных епархiй архиереи быша, по некоему же случаю зде вписашася, ибо в летописце полудестевом в лето 6724, а от рождества 1216, по Пахомии абiе Кирилл полагается, сице: преставися епископ Пахомий, а в него место поставлен Кирилл.
14. Кирилл, епископ из Суздаля, из Дмитриевского монастыря поставлен в лето 6724, а от рождества 1216. Прiят схиму в Суздале в прежнем монастыре, в лето 6737, от рождества 1229; престався в лето 6738, от рождества 1230.
15. Кирилл, вторый того имени, взят на епископство ростовское из Владимира, из Рождественскаго монастыря, посвящен от митрополита Кiевскаго Кирилла в лето 6739; а от рождества 1231. При сем бысть нашествие Батыево на Российскую землю в лето 6745, а от рождества1237. Сей потом ходил в Орду к царю Берке, и сына его от смертныя болезни молитвою здрава сотвори. Сей крести царевича Петра, иже из Орды в Ростов прiиде; преставися же Кирилл в лето 6770, а от рождества 1262.
16. Игнатий I, святый, первее архимандрит бысть, в Ростове в Богоявленском монастыре, таже поставлен епископ от митрополита Киевскаго Кирилла втораго, в лето 6770, а от рождества 1262. Сей епископ Игнатiй покры оловом соборную церковь Ростовскую и дно ея красным мрамором помостил в лето 6788, а от рождества 1280. Того же года запрещен бысть от священнодействия Кириллом, митрополитом Киевским, вины ради сицевыя; Князю ростовскому Глебу Васильковичу умершу и в соборней церкви Ростовской погребену бывшу, минувшим десяти неделям погребения того, изрину тело из церкви безчестно в полунощи, и повеле нести в монастырь Святаго Спаса, иже бе княгинин, закопати его просто в земли. Митрополит же в то время проходи грады Российския и исправляя духовныя управления, пришед в землю Суздальскую и уведав о том, еже сотвори епископ ростовский Игнатий, отлучи его от святыя службы, яко не богоугодное дело сотворша, и бе в запрещенiи епископ Игнатий некое время, дондеже не умоли о нем митрополита князь Дмитрий Борисович, и прости его митрополит, глаголя: Не возносися и не мни себе безгрешна быти и не толь много буди запрещая и отлучая, елико освобождая и прощая; ибо и мы нашим грехом прощенiе обретаем в прощении братий наших, и милост Господня в милости ближняго сокровена суть. Буди убо каяся до кончины твоея за дерзнутое дело твое, понеже прежде суда Божия осудил еси уже умершаго, его же прежде жива бывша стыдился еси и дары от него принимал еси, и ял и пил еси с ним, и веселился, и егда бе мощно исправити его, не исправил еси, то ныне ли хощеши исправити по смерти жестоко отлучая? Аще хощеши помощь ему сотворити, сотвори убо к Богу теплыя молитвы, и божественных жертв Его безкровных о душе приношение и молитвами Бога о нем упроси. Сице митрополит Кирилл епископа Игнатия отечески наказав, прости и благослови его. И поживе Игнатий протчая лега живота своего богоугодно и преставися ко Господу, по прологову известию, в лето 6796, а от рождества 1288, мая в 28 день; пас церковь Божию 26 лет.
Память Игнатiя маiа в 28 день.
В синодице между сими Иаков некий полагается, иже не бе тогда, но послежде бысть Иаков святый, последнiй епископ; по нем же архиепископы насташа.
17. Тарасий епископ поставлен от митрополита Киевскаго Максима в лето 6797, а от рождества 1289.
18. Симеон переведен бысть из Владимiрской епископии в Ростов, в лето 6807, а от рождества 1299; а во Владимiре седе митрополит киевский Максим. из Киева пришед, понеже не можаше терпети частых бывших на Киев агарянских нахождений, преселися убо во Владимир. В тожде время преставися преподобый Феодор, князь Ярославский, иже почивает в Спаском монастыре с чады.
19. Прохор, из Ярославскаго Спасова монастыря архимандрит, взят на епископство ростовское; посвящен от святого Петра митрополита в лето 6819-е, а от рождества 1311. Преставися в лето 6835-е, а от рождества 1327-е. В лето 6822-е, а от рождества 1314-е, бысть явление чудотворныя иконы Пресвятыя Богородицы на Толге, при реке Волге, под Ярославлем, о коем явлении пишется епископ бысть Трифон, но той Трифон не обретается на сем месте в лета оная ни в синодице, ни в летописце; паче же в летописце полудестевом в лето 6836, а от рождества 1328-е, пишется сице: преставися епископ Прохор ростовский месяца сентемврiя в 7 день, и поставиша Антония.
20. Антоний, поставлен от митрополита Феогноста в лето 6836-е, от рождества 1328-е.
21. Гавриил, поставлен от митрополита Феогноста в лето 6844-е, а от рождества 1336-е.
22. Иоанн II. Из архимандрита монастыря Святаго Спаса, иже в Москве близ двора княжева, взят на епископство ростовское и посвящен Феогностом митрополитом в лето 6854, а от рождества 1346-е.
23. Игнатий II поставлен от святаго Алексiя митрополита в лето 6864-е, от рождества 1356-е.
24. Петр. От тогожде святаго Алексiя митрополита поставлен бысть епископ Ростову, в кое же лето - несть известiя. В синодице церковном по Петре полагается Парфенiй, но мнится, яко той же есть и Петрь, ибо в книзе степенной, в II степени, в главе 7-й, три рядом воспоминаются епископы ростовскии, их же святый Алексий ставил: Игнатий, Петр, Арсений, а Парфений по Петре не воспомянен, но абiе Арсенiй положен. Обычно есть во святой схиме пременяемым быти именам, и можаше быти то, яко Петр преименовася в Парфения в восприятии святыя схимы.
25. Арсений I. Такожде от святаго Алексiя хиротонисан бысть епископ Ростову. При сем епископе пострижеся в Ростове святый Стефан, учитель Пермский: в монастыре святаго Григория Богослова и во иеродиакона поставлен.
26. Матфий гречанин, преставися в лето 6893-е, а от рождества 1385-е.
В синодице церковном по Матфие не положен святый Иаков, но абие Феодор.
27. Иаков святый, по Матфии бе, изгнан же бысть ростовцами от престола, живяше особо при городе. Не восхоте возвратитися на престол, аще и много молиша его изгнавшии его. И бысть иный архиерей Ростову, а он безмолвно до кончины лет своих поживе и преставися в лето 6900, от рождества 1392. Память его ноября 28 дня.
В сем 6900-м лете, от рождества 1392, нецыи написали истещи миру от иконы Пресвятыя Богородицы Толгскiя месяца септемврия в 16 день.
АРХIЕПИСКОПЫ РОСТОВСКIЕ.
28. Феодор III, племянник чудотворца Сергия, архимандрит Симоновский, с митрополитом Киприаном был в Цареграде, поставлен бысть тамо первый архiепископ Ростову. И прииде оттуда в Русь в лето 6898-е, от рождества 1390-е, и прiят престол, живу еще бывшу Иакову святому в состаренiи. Преставися же архиепископ Феодор в лето 6903-е, от рождества 1394-е, ноемвриа в 28 день.
29. Арсенiй II, поставлен от митрополита Кипрiана в лето 6903-е, а от рождества 1395-е.
30. Григорiй, поставлен от митрополита Кипрiана на Москве в лето 6904-е, а от рождества 1396-е. Сей благословил на игуменство Дiонисiа Глушицкаго, егоже память iюня в 1 день почитается. При сем архiепиcкопе Григории бысть пожар в Ростове велiй, в лето 6916-е, а от рождества 1408-е, месяца, июния в 21 день, и соборная церковь погоре со всем укрошенiем, и иконы и книги многiя старинныя, и сосуды златые и серебряные и каменные драгоценные, и священныя облаченiя, и жемчуги; и каменiе от пожара того распадошася и верх церковный провалися; и ины многи церквы погореша, и двор княжiй, и боярские дворы и людские, и ряды со всеми товары. Бе тогда сушь велiя и буря зельная, и вихорь велик зело, и людей более тысящи сгоре. В лето же 6919-е, а от рождества 1410, Григорiй архиепископ церковь соборную обновив, освяти октоврiа в 1 день.
Сей же Григорий архиепископ ростовскiй созда церковь каменную Благовещения Пресвятыя Богородицы на Дорогомилове в лето 6920-е, а от рождества 1412-е. Преставися же в лето 6924-е, а от рождества 1416-е, мая в 3 день.
31. Дiонисiй, поставлен от Фотiа митроиолита в лето 6926-е, от рождества 1418-е. Сей благословил преподобнаго Александра Кушскаго на игуменство, его же память июнiа 9-го почитается. Преставися же Дiонисiй в лето 6933-е, а от рождества 1424-е, октоврiа в 18-й день.
32. Ефрем II, поставлен от митрополита Фотиа в лето 6933-е, а от рождества 1425-е, апреля в 13 день, а преставися в лето 6962-е, от рождества 1454-е, марта в 29 день.
33. Феодосiй, архимандрит Чудова монастыря, поставлен архиепископом от сватаго Ионы митрополита в лето 6962-е, от рождества 1454-е, июня в 23 день. Сей архиепископ Феодосий, прилучившуся навечерiю Богоявленiя Господня в день недельный, в лето 6963-е, от рождества 1455-е, разрешил ясти мирским людям мяса, а иноком сыр и яица и рыбу, за что от преосвященнаго митрополита Ионы и от прочих архиереев соборне истязан быв, покаяся и прият от них прощение. Потом, святому митрополиту Ионе ко Господу отшедшу, преведен бысть ростовскiй архиепископ Феодосий на митрополию Московскую, в лето 6969-е, а от рождества 1461-е, маiя в 9 день. Сей первый поставлен на митрополию был Московскую своими архиереи не ходя в Царьград. Уже бо взят Константинополь турками в лето 6961-е, а от рождества 1453-е, маiя в 29 день.
34. Трифон, из архимандрита Новоспаскаго поставлен в лето 6970-е а от рождества 1462-е, мая в 13 день. При сем архиепископе прослави Бог в Ярославле мощи преподобного Феодора, князя Ярославскаго, почивающаго в едином ковчезе с чады своими Давидом и Константином. Бысть же то прославление в лето 6971-е, от рождества 146З-е, марта в 5 день, в субботу вторыя недели великаго поста, при архимандрите Христофоре. Сей же Трифон архиепископ бысть на поставлении Филиппа митрополита в Москве, в лето 6973-е, а от рождества 1465-е. Той же Трифон посылал есть протопопа ростовскаго Константина в Ярославль известитися о чудесех преподобнаго Феодора, не емляше бо веры о нем, и наказан бысть протопоп за дерзновение Божиим посещением, якоже о том в чудесех святаго Феодора пишется. Чесого убоявся, архиепископ Трифон остави престол свой в лето 6975-е, от рождества 1467-е, и прiиде в Ярославль в монастырь Спаский, и, пожив в нем, скончася, и погребен был за олтарем, идеже над ним гробница его зрится и по ныне.
35. Вассиан I из архимандрита Новоспаскаго, иже на Москве, поставлен архiепископом Ростову в лето 9676-е, от рождества 1467, декемврия в 13 день, Филиппом митрополитом, не тем, иже во изгнании пострада и святые его мощи в Москву честно принесошася, но иным, иже бе прежде. Сей Вассиан бяше ученик преподобнаго Пафнутия Боровскаго, а послежде написатель жития его. Память Пафнутия маия 1-го дня. Сему Вассиану пря бысть с Геронтием митрополитом, по Филиппе наставшем, о монастыре Кириловском, иже на Беле-езере, понеже той монастырь святитель Геронтiй начал бе отнимати от ростовския епархии, научаемый князем Михаилом Андреевичем. Чернцы бо Кирилова монастыря, в лето 6985-е, от рождества 1477-е, превознесшеся своим высокоумием суетным и богатством, не восхотеша под властию ростовскаго архиепископа быти и молиша о том князя Михаила. Князь глагола митрополиту. Послушав убо митрополит князя того, даде свою грамоту князю и монастырю, чтобы ростовскому архиепискому не вступатися в монастырь Кирилов. Архиепископ Вассиан нача бити челом митрополиту; митрополит же не послуша. Архиепископ убо бил челом великому князю Иоанну Васильевичу и прошаше суда по правилом на митрополита. Великий же князь посла к митрополиту, да не обижает архиепископа; но митрополит не послуша великаго князя. Тогда великий князь, пославь взят грамоту митрополичу у князя Михаила Андреевича, и созва вся епископы и архимандриты, повеле быти в Москве собору на митрополита, по правилом, от насилiя чуждыя епархии. Митрополит же соборнаго суда убояся, начат молити великаго князя, да будет миротворец между ими. И умири велиий князь митрополита со архиепископом ростовским и грамоту митрополичью издра, а Кирилову монастырю повеле быти по старине под властию ростовскаго архiепископа. Бысть же то смущенiе от игумена Кириловскаго монастыря Нифонта, новоначальнаго во иночестве, и от прочих новоначальных чернецов и от прихожих безчинников; а старии монахи, постриженники тоя святыя обители, вси тогда со слезами молиша Бога и Пречистую Богородицу и великих чудотворцев: Леонтия, епископа ростовскаго, и Кирилла, игумена своего белозерскаго, чтобы им жити в повиновенiи у своего святителя, ростовскаго архиепископа, как жил сам Кирилл, игумен их.
При сем архиепископе Вассiане преставися святый Исидор юродивый в Ростове в лето 6982-е, а от рождества 1474-е. Скончася же Вассиан архиепископ в лето 6989-е, а от рождества 1481-е, марта в 23 день.
36. Иоасаф I, бывый князь Оболенскiй, по кончине Вассианове, из Ферапонтова монастыря взят, поставлен бысть архиепископ Ростову от митрополита Геронтия в то же лето 6989-е, от рождества 1481-е.
При сем Касиан Углицкий пострижен бысть.
37. Тихон поставлен от митрополита Зосимы в лето 6988-е, от рождества 1490-е. Бысть же повелением великого князя Иоанна Васильевича, при том же преосвященном митронолитн Зосиме, собор в Москве в лето 6999-е, от рождества 1491-е, на новогородского протопопа Гаврiила и на прочия с ним еретики. На томь соборе воспоминается по митрополите в первых архиепископ Тихон Ростовский. Сей святитель потом изнемог телом, остави престол и сниде в монастырь святых страстотерпцев Бориса и Глеба, иже на реце Устье, в лето 7011-е, отъ рождества 1503-е, и скончася тамо в то же лето. Обретены быша мощи ярославских чудотворцев Василiя и Константина в лето 7009-е, от рождества 1501-е.
38. Вассиан II, архимандрит симоновский, поставлен бысть архiепископ Ростову Симоном митрополитом в лето 7014-е, от рождества 1506-е. Сей Вассиан бе потом на поставленiи Варлаама митрополита всея России в лето 7019-е, от рождества 1511-е. Преставися же Вассиан на Дрогомилове, и положиша его в Ростове.
39. Иоанн III архимандрит симоновский, во архиепископы поставлен от митрополита Варлаама в лето 7028-е, от рождества 1520-е, месяца февруария в 9 день.
40. Кирилл III, из Суждаля, из Спаскаго монастыря архимандрит, поставлен архiепископ Ростову от митрополита Даниила в лето 7034-е; от рождества 1526-е, марта в 4 день.
41. Досифей I, бывый на поставлении Макарiя митрополита московскаго, преставися в лето 7050-е, от рождества 1542-е, марта в 19 день.
42. Алексий, бывый игумен Троицкаго-Сергиева монастыря, поставлен архиепископ Ростову от митрополита Макарiя в лето 7051-е от рождества 1543-е, февраля в 17 день.
43. Никандр, тогожде Троицкаго-Сериева монастыря игумен, Ростову поставлен архиепископ тем же митрополитом Макарием в лето 7057-е, от рождества 1549-е.
44. Корнилий, архiепископ ростовский, воспоминается в соборе, на Москве бывшем, на нем же святители царю и великому князю Иоанну Васильевичу четвертый брак разрешиша в лето 7080-е, от рождества, 1572-е.
В синодице, по Корнилiи, положены архiепископы: Иона, Аврамiй, Евфимий, Давид. От тех Иона, мнится, быти той, иже почивает вне церкви одесную олтаря, противу гроба Леонтiя святаго, о коем Ионе сказуется, яко поставлен бысть во архиепископы Ростову в Москве, иже и скончася тамо, не дошед до своего престола; умирая же, повеле везти тело свое в Ростов и погребсти не внутрь церкви, но вне.
45. Иов, епископ коломенскiй, преведен на архиепископию ростовскую митрополитом Дионисием, в лето 7094-е, от рождества 1586. Той же Иов преведен из Ростова на митрополiю московскую в лето, 7095-е, от рождества 1587-е, декемврия в 11 день. Он же учинен первый патриарх в Москве в лето 7097-е, от рождества 1589-е, генваря в 26 день.
Доброй охоты всем нам!
|